新城搞嘅「愛書才會贏──我的小時候」講座，請到女大狀兼立法會議員余若薇、導演張堅庭同作家陳慧，分享小時候讀書感受。Audrey（余若薇）對於要公開兒時讀物大發嬌嗔，話大家如果知道佢由細睇「兒童樂園」同「良友之聲」，就估到佢芳齡。佢細個都有睇好多英文書，第一本係LittleWomen（小婦人）。
𠵱家Audrey成日俾細女考起，皆因囡囡每次去圖書館借書，多數都借IQ常識書，用嚟考媽咪智慧。Audrey諗起唔識答「人體哪部份散熱最快？」就覺得瘀！
張堅庭就冇Audrey咁幸福，自言家貧睇書靠黐，第一本書竟然係四年班時睇家姐嘅愛情小說、瓊瑤大作「六個夢」。冇書睇又成日去廟街聽賣跌打藥嘅阿伯講古仔，最慘烈經歷就係俾阿伯「昆」佢試跌打藥，當晚竟然屙藍色尿液，第二日去算帳，跌打佬反而搵阿庭做生招牌，話證明啲藥真係散到瘀血！
（圖）張堅庭同余若薇小時候係點嘅呢？
傳真︰2623-9278
電郵︰