官場友人慨歎做官難，做特區官更難，做特區問責官直情難！難！難！唔信？有辦你睇……財經事務及庫務局局長馬時亨，返工未夠兩個月，瘦咗十幾二十磅。佢講起此事，八方都記得有次喺太古廣場見到馬仔，如果唔係佢對招牌有tassel嘅loafer一睇就認得，都唔敢肯定眼前人就係肥仔馬。友人笑謂，假如佢過唔到仙股調查委員會呢關（一定唔會啦），大可以轉行去收身舖瘦身堂做代言人。
自從仙股事件上立法會俾人糟躓之後，馬仔轉趨低調。佢唔係隱咗形，只係唔點講嘢；好似前日公務員吹水研討會，馬仔都有去，重畀記者撞到，不過佢就變番好似電盈時代咁惜言如金。今晚，馬仔又會應邀去中華廠商會個晚會演講，講債券市場發展，睇吓記者有冇計令佢開番口。忽然諗起，如果廠商會想送番份紀念品畀局長，可以考慮林行止嘅著作，或者一個精美文件夾。
講番仙股調查，聽講兩位調查員羅正威同鄺志強搵咗相關人士去畀口供，梁錦松同馬仔已畀咗；相關團體之意見亦收集得七七八八，可能趕得及九月十號完成報告，還馬仔一個公道。
傳真︰2623-9278
電郵︰