老細K話請我去新鴻基海都飲茶，本來有啲意動，但係已約咗老友去中華總商會會員俱樂部，只得多謝一聲，拜拜而去。
中總會員俱樂部係會中有會，中總普通會員須先交一萬入會費，再交五萬元入俱樂部費，重要有啲阿頭簽名推薦至得，入會並非好容易。中總六樓七樓就係俱樂部，中午、夜晚供應正宗粵菜，夠晒地道，價錢唔算貴，幾好㗎。
成班老友食飯，言談不禁。大家憶苦思甜，講吓富豪發達史、六七十年代，紡織界廠商憑炒配額（quota）發達者，大不乏人，而佢哋全靠銀行融資。銀行家專門助人發達，自己冇得發達，認真發嘅話，就會惹人思疑。賓架C話：「點解我哋當年唔炒埋一份呢？皆因以為自己知得多，認清楚風險，思前想後，冇勇氣炒埋一份。嗰陣同啲老友落Club，見到夜夜笙歌、揮金如土嘅人就係炒quota嘅紡織佬。」我哋笑賓架C多讀書，機會成本高，唔識發達。其實笑人亦即笑己，諗落就笑唔出。
食完飯鬆人，見到成班保險界。其中一位識得嘅就話：「呢度係陳智思議員飯堂，幾乎日日在此，今日佢安排時亨馬與保險界選民見面，交流交流。」馬局長在立法會話：「我周時同你哋食飯嘅噃……」成為笑談。事實上，坐佢嗰位，點唔會日日同財經金融界食飯吖，佢冇講大話，只係在不適當地方及不適當嘅時間講不適當嘅真言而已。