唔經唔覺，重有幾日就到歐冠盃球員註冊截止日期，對買唔到新球員嘅曼聯來講，呢幾日肯定心急如焚。
自從李奧費迪南係季前熱身賽受傷，費爵爺早已經開始搵定球員補充兵源，點知傾到𠵱家都係無結果。原來曼聯行政總監簡安禮拜一專程飛去巴黎，就收購艾斯古迪同雷恩高層講數；唔知係咪曼聯嫌嗰位球員𠵱家有膝傷關係要求割價，所以傾咗三個鐘頭，雙方都係無法達成協議。另一邊，小保加見曼聯買唔到後衞就獅子開大口，叫價七百萬鎊先至肯放走貝迪素，足足同「紅魔鬼」開四百萬鎊條件相差一大截。之不過，我求大俠就覺得，既然曼聯𠵱家等人用兼時間無多，堂堂超級大會鬧兵源荒，俾人賺多幾百萬鎊都應該落搭啦！
迪奧夫上個禮拜對修咸頓終於打出身價波，幫利記省入兩粒之餘，最近重做咗「牙擦蘇」，好有信心咁話將今季英超聯入球目標定係十五球。其實，我求大俠睇過佢呢兩個入球，難度唔算高，所以唔可以完全代表已經適應英超聯，咁快就講定入球目標，呢位哨牙仔到時唔得因住出醜啊！
兩支今季降落英甲嘅葉士域治同打比郡係前晚聯賽持續唔掂，尤其係季前揚言話要入一百球嘅葉士域治居然爆冷主場輸俾財政出現危機嘅巴拉福特；打比郡開季到𠵱家踢五場就更加輸咗三場，搞到捧場波友損手。反而，樸茨茅夫大肆擴軍後真係幾對辦，值得繼續追捧。
早前一直為落班擔憂嘅楊晨同謝暉都已經係德國落到班，所以𠵱家係歐洲嘅中國球員只係淨低范志毅無着落；之不過，「范大將軍」就爆料，話下星期好可能離開鄧地轉去喜伯年，繼續蘇超生涯，雖然喜伯年家陣包尾，但都好過浪費時間。我求大俠一句講晒––祝佢好運啦！