港股噚日重係十分淡靜，阿虎又聽到個壞消息，e莉莎今日開始失業無嘢做，加上最近又失戀，成為雙失美少女，阿虎都唔知點安慰佢好，最慘就係香港無論樓市及股市托極都唔起，完全見唔到曙光。
董特首與及一眾問責而唔負責嘅局長成日去擦大陸鞋，但暫時都唔見中央有咩好處畀香港，搞到香港冇錢又冇面，更加令人沮喪。恒指收市報10185，跌40點，成交40.88億元。
兆晉國際（491）噚日終可復牌，公司話大股東劉國輝已經減持1億股，但手上重有9.7億股；另外按每股1.52仙配售4.921億股畀債權人，債權人隨時會沽出呢批股份套現。此外，大家要留意兆晉配股畀MoneyMaster，股數達6.58億股（相當於兆晉國際8.47%），涉資950萬元。
據聞MoneyMaster日後可能會成為兆晉大股東，所以刺激股價一度大升37%，不過其後又打回原形，全日收1.9仙，冇升跌，成交791萬元。
睇情形，要沽貨嘅人已經借賣殼煙幕出咗唔少貨，不過相信有關人士重有大把貨要沽，撈底者要小心。
國泰（293）中期業績咁好，而中國經濟一直處於高增長，因此冇人諗到東方航空（670）及南方航空（1055）業績竟會分別大幅倒退63.7%及39%，嚇到芬佬即時走貨，東航大跌9.4%，南航亦跌8.3%。
睇番兩隻航空股，業績倒退主要因為滙兌虧損、燃油成本上升，以及保費增加，兩隻內地航空股管理水平有待改善。
阿虎