英皇3T小花之一嘅Yumiko（鄭希怡），早排喺中環一間高級餐廳度，為處女歌《相對濕度》拍MV，而Yumiko對今次拍MV，事前準備工夫做到足，絕對不容有失。
Yumiko專誠跟跳舞老師進行咗一個禮拜嘅地獄式訓練，日日排舞同拉筋，練足十幾個鐘，加上佢每日都係食健康餐，七日就瘦咗八磅，𠵱家佢嘅體重只係得番一百零三磅，所以Yumiko都要改過晒啲舞衣嘅尺寸。
不過，Yumiko喺拍MV嗰日就差啲搞出個大頭佛。話說間餐廳嘅家具全部係喺外地訂返嚟，有啲重係古董㖭，點知Yumiko一時跳得太勁，差啲撞跌一個價值成百萬嘅花瓶，Yumiko當時嚇到一額汗，佢重話：「好彩有驚無險，如果唔係我就要留喺度幫老細打工。」
李蘢怡噚日去咗港台幫手做客席主持教人減肥，不過佢雖然話係教人減肥，但就俾人笑佢肥。
李蘢怡對於俾人笑，佢話：「唔緊要，我會繼練努力減肥，阿倫（譚詠麟）話韓君婷可以減到咁瘦，我哋都得㗎！」
李蘢怡就話佢都想有人搵佢拍纖體廣告，有錢收又可以減肥。
陳慧琳（Kelly）早兩日去咗日本幫Sony拍咗個手提攝錄機廣告，內容講述Kelly用攝錄機拍運動會同萬里長城時，唔覺意將外星人拍入鏡頭，最後重跟啲外星人移民咗去佢哋個星球度住。
Kelly被問到如果真係見到外星人會點樣，佢笑住話：「如果真係嘅話，可能我𠵱家已經唔喺度！」
趙薇早前喺香港宣傳《夕陽天使》時，有個電影公司外籍男高層陪佢行街買衫，呢個人日前亦跟趙薇去新加坡做電影宣傳，重俾記者追住訪問。據呢位外籍男子講，佢冇同趙薇拍拖，只係因為同趙薇嘅經理人熟，所以先會帶趙薇行街買嘢。而佢其實係哥倫比亞電影公司亞洲區製作兼宣傳經理，中文名叫葛路明。
商台前晚四十三周年台慶，喺尖沙嘴美麗華酒店舉行慶祝會，全台DJ都有出席。遲啲商台會幫吳君如搞個fanclub，君如話：「其實我都唔係好想搞，我又唔係歌手。」問君如有冇加人工？佢話：「我年年都有花紅，七位數字都收過，不過今年淨係收到五百蚊利是。」
蕭正楠噚日到港台接受訪問，講到佢喺內地工作時，有人誤認佢係劉愷威，問佢有冇尷尬？佢話：「其實都唔尷尬，但喺香港就好少有咁嘅情況。」霆鋒將小休暫別樂壇，唔少人都揣測邊個可代替霆鋒，蕭正楠亦係俾人睇好嘅一個，佢話：「咁我聽到都會開心，但我覺得話係代替點都講唔通。」