被炒家指為仙股風暴中最大受害者嘅兆晉國際（491）噚日復牌，雖然一度急升過3成幾，但最後只係平收1.9仙。
經紀黃話，經歷過重創嘅股份，真係唔易復元，雖然兆晉仍然搵到人認購新股集資，但睇嚟要收復失地，仍有漫漫長路。
兩個星期前兆晉停牌，明明係話可能出現新主要股東，所以重以為佢賣殼，點知原來只係發行新股，部份用作償債，部份係集資，總之就多咗十幾個巴仙新股出嚟，但又唔係一個人要晒，而係分畀幾個人，並冇出現新主要股東。
睇嚟兆晉根本無意思賣殼，仍然想力挽狂瀾，今次公司發新股，若落在友好手上嘅話，就算大股東繼續被斬倉，控制權可能仍然守得住。
另外，由首富買咗嘅建聯通（067），近排日日都守住90仙水平，兼且成交好暢旺，由於佢唔夠公眾持股量，要批番啲貨出嚟，但好似到家陣仍未搵到一主好人家。
慕容小初