「得罪人多稱呼人少」
黎明斥張衛健冒險博頭條

張衞健（健仔）日前在公開場合批評黎明愛博宣傳，事後健仔在電台節目中認「低威」，不過黎明前晚接受訪問時作出反擊，暗指健仔造新聞及博宣傳。

張衞健日前出席好友劉德華（華仔）的一個面對困境分享會活動時，為撐華仔不惜批評黎明和梁朝偉，健仔指黎明愛博宣傳，而梁朝偉平時為人則太cool。
遭張衞健批評的黎明，前晚與陳可辛到商台接受吳君如主持的節目《嘩！嘩！嘩！打到嚟！》直播訪問，黎明在節目尾聲時，被君如問到遭健仔暗踩他愛博宣傳一事，黎明說：「我Leon永遠係一句話，食飯一齊食，獨食難肥，留番下回分解。」

「娛樂事業分兩種」
其後黎明接受記者訪問，他表示看過有關報道，黎明說：「娛樂事業分兩種，一種造新聞，一種係博頭條。藝人同娛樂記者要配合，記者返公司，由公司決定邊單新聞係頭條，呢啲係造新聞。而博頭條都含賭博成份，有風險，得罪人多稱呼人少。」

「冇為呢單嘢激氣」
對於自己是否一個愛博宣傳的人，黎明說：「人哋點講，我冇嘢好講，我有冇咁做吖？觀眾最清楚。人哋點講我冇嘢回應，我冇為呢單嘢激氣，否則係我唔明白事理。」

拒評論健仔道歉
那麼黎明認為張衞健這次驚人言論是造新聞，抑或是博宣傳呢？黎明說：「咁大家自有分曉，有啲人覺得係，有啲人覺得唔係，唔係由我哋把口分曉。」
健仔日前在港台節目《開心日報》中公開就此事道歉，對此黎明說：「唔需要回應，每個人有自己反應。」不過黎明的歌迷對於偶像被詆毀一事，都有透過傳真發洩不滿，黎明說：「我覺得每個人有自己嘅反應，Leon做錯嘢一樣會有人寫信去反映，我冇睇到就唔知。」
採訪、攝影：卓美娟