美股周一晚反覆靠穩，杜指升46點，收8949，仍守住升軌（現處8813）及50日線（現處8789），整體技術仍偏好。
美股雖然反彈，但力度並非太強，港股噚日早段稍為上升40點就回頭，趙飛雲喺11點見到期指跌穿之前低位10210，決定先清貨離場，恒指最後收10185，跌40點。
恒指噚日下試20日線（現處10130）獲支持反彈，尾市期指亦反彈得甚急，淡友雖部署反攻，但其實好淡仍旗鼓相當，等待消息決勝負。趙飛雲覺得後市唔明朗，既然有錢賺，所以先清貨離場。
其實倉內嘅百江燃氣（8132）技術仍未變壞，短線跌近升軌支持（現處3.375元）唔穿，可伺機撈番，中長線仍看好。上海實業（363）近期走勢頗為波動，短期有機下試升軌支持12.25元，到時可伺機撈番。上實本周五公布中期業績，若以全年計，有分拆光明乳業特殊收益墊底，應該唔會太差。
至於噚日推介嘅艾克國際（8179），突然急升38%，收0.18元。不過買賣盤隔價離行離列，根本買唔到貨，冇正常流通量嘅股票，散戶好難玩。
趙飛雲