洋名阿John的房屋及規劃地政局常任秘書長曾俊華，功夫了得就係人都知，據聞佢可以隨時赤手空拳打碎一塊磚頭（做佢頂頭上司嘅孫明揚請就住就住，無謂開會傷和氣！）。不過，原來除了強身健體外，練功夫都有附加價值，就係令阿John做了模範老竇。
阿John同八方話，佢從來唔會打仔。點解？阿John笑笑口：「我仔女細時，我啱啱學緊鐵沙掌。自己知自己事，一出手隨時唔覺意大力咗，打親細路仔，到時唔知點算。」
於是，這位練鐵沙掌的老竇，在一對寶貝仔女面前反而變成沙包。有人話練功夫會令人有暴力傾向，如果睇阿John呢個例子，情况似乎唔係咁噃。
阿John有一仔一女。佢大仔大學畢業後，留在美國打工，從事酒店行業。細女今年畢業之後，千挑萬選終於揀咗返嚟香港做嘢，入咗貿易發展局。
據聞曾小姐非常猛料，不但留學美國，而且先後到過日本、北京遊學。畢業後幾份工爭住請佢，而且重唔止香港公司，巴閉！
乖女留港，難怪阿John夫婦近日好開心。
傳真︰2623-9278
電郵︰