有人話口大食四方，又有人話口大食窮郎，其實大食無罪，在日本大食反而着數多多，話說日本有不少食肆，都推出大胃王挑戰賽，客人只要在限定的時間內食完重量級份量嘅食物，不但唔使畀錢，食免費餐外，刷新紀錄者更獲得獎金，真係名正言順嘅又食又拎！
記者：陳珮娟
攝影：黃子偉
鳴謝：新華行股份有限公司
食嘢唔使畀錢又有錢收，咁大隻蛤乸究竟喺邊到搵？答案就係面積細細嘅陣！因為該店舉辦的大食挑戰賽，勝者有機會奪得30,000円獎金！話說主持人西野芳男師傅在未遷入現舖時，有一個非常大食的學徒，每次員工食飯的時候，他吃得都比別人多，後來他考入大學，西野師傅特地煮了一塊JumboSize的豬扒來獎勵他，最後靈機一閃，當陣遷入現址後，西野師傅便舉辦大食挑戰賽，凡於25分鐘內食完這塊大豬扒、菜絲、白飯及湯的客人，都可獲贈免費餐，而破紀錄者，老闆更會私人醒你30,000円㖭！經濟低迷下，亦不失為一個搵錢的方法！21年來，參加人數每年多達600多人，迄今男紀錄保持者，只用了9分10秒便食完整個豬扒餐，而女紀錄保持者也只比男參賽者多6分多鐘完成，時間為15分30秒，絕對不簡單！
陣 地址：東京練馬區豐玉北5-18-7地下
電話：(81)3-39943128
營業時間：每日11:30a.m.-2:30p.m.及5:00p.m.-9:50p.m.，逢星期六休息
交通：乘地鐵西武池袋線練馬下車，從南口一出，會看到對面馬路的麥當勞，在麥當勞旁的小橫巷轉入即到達食店。
挑戰失敗懲罰：需付Jumbo豬扒餐的費用，每客5,000円
下北沢這個賣型人用品的地段，香港人應會十分熟悉，但在下北沢的橫街內，有一間毫不起眼的食店，專賣廣島燒這種日式薄餅。本來這種主要用菜及麵條煮成的日式薄餅，其實已賣到街知巷聞，但安芸亭這裏卻因為舉辦薄餅大食挑戰賽而變得與別不同。食店的牆上掛滿成功者及失敗者的照片，表情古怪抵死！當我們表明來意後，店長神崎師傅立即拿出粉漿、生菜絲、肉片、雞蛋及拉麵條等，左炒右炒，不消一會便炒成一個直徑達35厘米的大薄餅，只要你能在半小時內掃清這個大薄餅，今餐又可以慳番！今年已有43人挑戰過，只得19人成功，而且還沒有人打破籐田氏保持嘅8分鐘紀錄，各位大胃王，加油呀！
安芸亭 地址：東京世田谷區北沢2-1-8地下
電話：(81)3-34180250
營業時間：每日11:00a.m.-11:00p.m.
交通：乘地鐵小田急小田原線下北沢下車，從南口依大路直行約５分鐘，留意左邊的橫街。
挑戰失敗懲罰：需付一個廣島燒的費用，每個2,000円
日本拉麵似乎是到東瀛必食嘅食物之一，但一碗拉麵閒閒哋600-700円，一點也不便宜。想食免費拉麵，可以試試位於新代田 附近的康新。營業至凌晨5時的康新拉麵，推出驚人麵餐，只要你能在30分鐘內搞掂一碗足五人份量嘅中華拉麵，老闆唔收你麵錢之餘還會奉上5,000円給你，若你是更大胃者，可以更上一層樓，挑戰8人份量，連湯清埋，8,000円獎金就能袋袋平安，不過話畀你知，呢筆錢實在唔易賺！
康新 地址：東京世田谷區代田5-28-3地下
電話：(81)3-34122531
營業時間：每日10:00am-5:30am，逢星期日休息
交通：乘地鐵京王井 頭線，新代田出口向左走約2分鐘
挑戰失敗懲罰：需付拉麵費用，5人份量5,000円，8人份量8,000円。
出門提一提
簽證：持BNO、特區護照者均須簽證，持CI則者須辦理。查詢：25221184（日本總領事館）。
機票：乘全日空航空往東京，來回機票價2,800港元，17日有效期。查詢：23900421（學聯旅遊）
貨幣：每1,000日圓約兌6.7港元
住宿：HotelCenturySouthernTower，雙人房每晚22,000円起
地址：〒151-8583東京都澀谷區代代木2-2-1
電話：(81)3-53540111
傳真：(81)3-53540100