上禮拜五美股唔掂，港股昨日算係硬淨，波幅窄，恒指只係微跌19點，期指反而有進帳16點。比較特別嘅係，總成交得33.3億元，只及前市唔夠6成。期指後日結算，成交咁靜，又冇乜拋售壓力，結算時挾上多過挾落，玩窩輪，買Call着數過買Put。
唔想揀個別藍籌Call輪，可向恒指Call輪埋手，對象係9406同9408，兩隻輪都係交投量大，易買易賣。末日輪9201，已經接近冇得剩時期，收1.1仙。下月27日到期，行使價11500，恒指𠵱家至係10226，距離隻輪有1274點，望1個月內恒指有咁大嘅升幅，好唔實際。博大市好轉揸恒指Call輪，咪搞9201。
中信泰富（267）派半年成績表，多賺31%，股價未及反映，收17.05元，跌30仙。個市似乎興宣布成績後趁消息出貨，正好趁低買貨。中信再跌些少，不妨收啲中信Call輪。中信Call輪年底前到期嗰批，多數溢價低，揸貨唔怕輸溢價。主角對象係9037同9160。9037今年11月到期，現價25.5仙，平水，槓桿率6.7倍。9160下月杪夠鐘，現價25仙，負溢價0.2%，槓桿率6.8倍。兩者比較，9037略勝一籌。
章 盛