張栢芝與古天樂（古仔）主演的《我家有一隻河東獅》將於下月尾上映，電影拍攝期間，兩位主角傳出緋聞，導演馬偉豪昨日接受電話訪問時說：「佢兩個喺鏡頭前情投意合，真心相愛，但鏡頭外，我就冇乜留意啦！」
栢芝在片中飾演杭州才俊陳季常的惡妻柳月娥，兩人成親當日，古仔以大紅花轎迎接栢芝，不過栢芝在洞房當晚顯露惡妻本色，古仔才知道娶錯老婆。
馬偉豪說：「呢場結婚戲拍得好落本，單係古仔同栢芝套新郎、新娘服就好名貴，每件要成二萬幾蚊，咁貴係因為我哋專登喺蘇州搵名師造。我哋覺得呢場戲好重要，所以想拍得更認真。」
對於首次與張栢芝和古天樂合作拍戲，馬偉豪說：「記得古仔拍煞科戲時，佢咳得好厲害，佢話可唔可以休息吓，咁我當時話除非你咳到出血啦，點知冇幾耐佢攞住一張有血迹嘅紙巾畀我睇，佢話真係咳到出血，後來先知佢係開玩笑。」