彭羚、向小喬、李心潔、楊天經同河國榮等，前晚喺灣仔演藝學院演出最後一場《但願人長久鄧麗君》音樂劇，眾演員都喺演出後，去咗灣仔鴻星海鮮酒家出席慶功宴，鄧麗君嘅母親同哥哥鄧長禧等都有到場。
彭羚同鄧媽媽喺慶功宴上互相問好，重好好傾。彭羚表示做完音樂劇之後好唔捨得，佢老公林海峰前晚重帶埋手持柺杖嘅媽咪去，而鄭秀文亦抽空捧場。彭羚話：「我做舞台劇做上癮，鄧媽媽雖然喺睇第一場嘅時候，因為睇到劇情勾起往事，佢中場就離開咗。不過鄧媽媽都讚我唱得好似。」
鄧長禧話亡妹鄧麗君赤柱故居已公開招標，傳聞價錢達四千至五千萬左右，佢用國語話：「公開招標的價錢好像不太好，全世界都不景氣。賣給誰就要看緣份，賣得的錢會在上海成立紀念館和藝術學校。這套音樂劇反應很好，現正計劃明年初在內地和東南亞等巡迴演出。」
早前藍潔瑛情緒大起大落，噚日佢竟然返回電視城為《娛樂大搜查》拍攝外景，有纖體公司搵佢做代言人，藍潔瑛話：「𠵱家都係考慮中，因為價錢真係麻麻，但對方就冇要求着泳衣。」至於會否重返無綫拍劇，佢就話：「唔知呀，但無綫冇同我傾。」
郭羨妮噚日喺電視城為新劇《牛郎織女》試造型，一直同馬浚偉傳緋聞嘅佢，噚日向記者大呼冇人追，郭羨妮話：「好多朋友都以為我同馬仔係真嘅，所以冇人敢追我，簡直情況危殆。」而早前跟前緋聞男友古天樂到台灣宣傳時，二人毫不避嫌蹺手，對此佢回應話：「我哋根本就冇嘢。」
劉青雲早幾日接受新城電台《娛樂一早》主持人李麗蕊訪問，談到對黃秋生同吳鎮宇一班好友嘅看法時，佢話：「我覺得秋生係個比較率直同感性嘅人，而鎮宇就好似喺外太空嚟嘅，去得比較遠少少，佢有啲嘢好叻，當演一個角色嘅時候，佢就好似會聞到嗰種角色嘅味道咁。」談到自己與影帝無緣一事，佢就話：「我冇去諗點解，畀佢係因為佢好過你。我𠵱家嘅心態係有就好開心，冇都唔會唔開心。」
謝霆鋒嘅老友陳冠希（Edison）噚日喺台北中正機場出現，初時以為佢專登去台灣探霆鋒，細問之下，先知佢係為咗自己今日下晝兩點喺台灣舉行嘅簽唱會，專登過去做宣傳，Edison話今次嘅行程都幾緊湊，大概會逗留三、四日。
今日係張智霖三十一歲生日，佢話今年只係會同幾個老友食飯，事關每次開生日會都係班好友玩得開心過自己，女友袁詠儀（靚靚）送咗一個可以影相嘅手提電話畀佢做生日禮物，而靚靚就喺下個月四號生日，佢話都已經諗好送手表畀靚靚做禮物。
樂壇新人麥浚龍、黃依汶同嘉碧儀噚日喺赤柱大街拍攝《Juno與他與她》音樂特輯，日前李克勤發表有錢使得鬼推磨言論暗串Juno，噚日Juno回應話：「我唔認同錢係萬能，克勤唱歌唱得咁好，唔通用錢可以買到咩！」
有傳張可頤同江華合作拍攝新劇《朕到未來》時，因江華姿整，每次都要化妝兩小時先開得工，等到可頤扯火，噚日可頤直斥報道無聊，佢話：「我只知道佢好貪靚，不過係人都會遲到，至於係咪因化妝所以遲咗就唔知，記憶中佢冇遲兩個鐘咁多。」