早前，亞Mark提過嘅日產Elgrand同Primera車系，前者經已正式在港推出，而後者嘅Primera如果無估計錯誤的話，相信嚟緊9月又會同香港車迷正式見面喇！雖然近期日本中價車市場競爭激烈，而銷量亦大不如前，但若然車價同車款吸引的話，相信亦會吸引到班年輕車迷注視；而據知率先打入本地嘅新款Primera會以2.0公升型號作主力，頂級2.5公升版本卻欠奉。而有幸親身接觸過Primera嘅人就話，部車造型前衞有個性，若然車價可定於17萬上落的話，大抵可跟萬事得Mazda6、本田Accord同豐田Camry抗衡，唔信就耐心等吓喇！