趙飛雲噚日晨早撲去股票行，諗住嚴陣以待，點知大市靜如死水，恒指全日高低波幅71點，成交跌到只有33.36億元，恒指最後收10226，跌19點。
技術上，恒指稍微跌穿升軌支持10250，前日講過若恒指跌穿升軌收市，就沽出恒指Call輪9406，但噚日咁薄弱嘅成交，技術走勢參考價值大打折扣，所以決定睇多日，博美股周一晚有反彈。
美國今個禮拜公布嘅經濟數據認真多，美股可能會大上大落，因此趙飛雲亦提高警覺，市況一旦逆轉，倉內嘅持貨就計數離場，其實噚日港股成交只有33億元，反映好淡皆睇唔通，唔敢輕舉妄動，等候消息出擊。
噚日大行老友約飲下午茶，叫趙飛雲留意軟件方案公司艾克國際（8179），佢話Intel沽出手上11.95%艾克股權，只係獲利計數，並非睇淡公司前景，因為Intel入股時價錢遠低於招股價。
今次接貨嘅李先生據聞有中資背景，非常睇好艾克前景。另外，公司最近推出銀行軟件，甚受歡迎，側聞快有好消息公布。不過艾克交投疏落，屬買賣十分困難嘅股票，需要耐心慢慢收集。
艾克舊年叫做有錢賺，今年估計業績會更上層樓，有炒業績概念，有耐性嘅讀者不妨留意吓。
趙飛雲