講起開店舖搞生意，好多人都以為要好多錢，就算北上創業動輒都要幾十萬。不過，像香港人Terry與Johnathan這兩位好朋友，為實現創業夢想，攜手走上羅湖開設精品店，更成為著名水墨畫家「阿虫」喺國內的首間銷售代理，而其創業本錢也只不過是5萬多元。
記者：劉耀攝影：陳智
目標
兩個相識十多年的老朋友Terry與Johnathan，各自擁有不同的家庭及工作背景，卻因共同有個創業的夢想，而令他倆走在一起。由於Johnathan從事平面設計將近十年的關係，選擇了售賣設計特別的精品為創業目標，並四出搜集資料。「由於深圳的精品店多集中在百貨公司，而設計獨特的擺設就更為少見，於是就以設計意念作為精品店的主題，客路集中在知識及文化較高的層面，希望靠設計意念做到與眾不同的效果。」
準備
既然精品店以知識及文化水準較高的顧客為主，對店舖選址就更加審慎。「除了靠睇報紙及雜誌以了解內地的消費熱點外，我哋還參加內地創業團，認識更多創業竅門及注意事項，自己亦不時上嚟周圍行，遠至廣州，近至福田都有睇過。但唔係租金貴就係形象配合唔到，最後搵咗三個月先搵到位於羅湖區的佳寧娜友誼廣場，各方面都OK，所以就決定喺度開精品店。」
店名
精品店的裝修以簡約為主，所以裝修過程只花上約三個星期便可交貨。「由於商場方面有裝修師傅介紹，加上裝修師傅都係香港人，所以在討論裝修時就更加容易明白對方需要。」裝修過程十分順利，滿以為可以如期開張，豈料就店名問題竟然花去不少時間。「起初本來打算用『生活無限』為店名，但有關方面認為涉及思想形態，所以唔批准，經過再三修改，最後以『藝能精品店』才能正式登記。」
申請牌照
1.工商營業執照：目前只有羅湖區部份地方可由香港人持牌
2.國稅及地稅：申請成功後，再向稅務局登記國稅及地稅
3.消防牌：若開設於商場內，則由商場代辦
貨源
開業只有兩個多星期的「藝能精品店」，貨源方面暫時以香港產品為主，其中更有港人所熟悉的「阿虫」水墨畫。「開店至今只係好短時間，貨品款式仍在探索階段，不過現時主要從香港代理處取貨，亦引入阿虫的水墨畫售賣，由?40至?200不等，希望迎合顧客口味之餘，亦可替店舖提高形象。」
大計
精品店仍屬起步階段，但Terry與Johnathan對未來已充滿信心。「開舖頭最希望係開分店，甚至係連鎖店，而且會首選廣州。亦希望將來可以發售自己設計的精品，以『生活無限』為品牌，打響名堂。」