早前曾提及日本本田車廠，正有計劃繼Beat之後再度推出微型Roadster開篷跑車，據知呢部新車有望於2003年底或2004年初面世；新車尺碼較Beat為大，但相對於S2000卻細咗一個碼，並會以一台新開發嘅1.0公升偈為骨幹；呢部雙座位小跑車，造型帶點仿古味外，佢重用上前置引擎後驅配搭，務求以好玩嘅操控性作招徠嘛！然而，究竟新車會配用軟篷頂抑或係硬頂呢？雖然暫時未有定案，但相信會快將揭盅。
被視為街道戰神嘅日產SkylineGT-R快將重生喇！據廠方披露，新一代戰神有望於2003年下半年面世，全新造型嘅SkylineGT-R，造型包裝惡形惡相之餘，新車會以一台3.0公升V6偈作主打，並有望頂級版輔以Turbo裝置，及一套先進嘅四驅系統，以重拾昔日戰神響街道稱王嘅歲月嘛！日後面世嘅SkylineGT-R，會主攻北美市場，而有唔少Fans嘅香港，就未知代理會否引入喇！係戰神迷嘅你就要密切留意喇！