港股噚日只得33億元成交，真係淡過淡水，卜架已經搵唔到返工嘅意義，睇怕港交所（388）應該考慮縮短交易時間，而唔係延長交易時間。
一群莊家股公司正着手組成聯誼會，聽講佢哋要打正保障股東權益作為旗號。呢單嘢真係令到阿虎唔識點反應，只覺得有啲搞笑。
不過，莊家都係投資者，要保障本身利益當然可以，但希望佢哋唔好犧牲其他股民嘅利益，要多啲盡吓維持市場秩序嘅責任，提供交易流通量，至少要畀股民一個止蝕嘅機會，唔好一撤軍冇晒成交咁肉酸。黑客話呢個聯誼會，主要因為細價股事件而催生，因為港交所推出除牌機制，對佢哋手上嘅細價股殼價有舉足輕重影響，一眾莊家有見及此，故聯成一線爭取發言權。
以排毒美顏寶聞名嘅龍發製藥（2898）招股上市，據聞配售部份嘅1.35億股，已獲中資圍晒飛，準備勁炒，想攞貨只能透過公開認購部份認購，相信認購倍數會被谷高。在現時股市悶局中，相信龍發可以提供少少樂趣，不過玩時玩，小心有人「排毒」令股價急瀉。龍發招股總數1.5億股，每股作價0.34元，集資額僅5100萬元，可算係細細粒容易食。
新地（016）雖然沽出2500個珀麗灣單位，但地產股未能受惠，投資者對地產股依然審慎。市場對珀麗灣反應咁好，但新地竟然唔封盤加價，一口氣賣清光2500個單位，其實一定程度上反映發展商對後市持審慎態度，有需要減磅降低風險，反正日後可以繼續賺取高昂會所會籍費用及管理費。
阿 虎