前利物浦隊長列納喺上個禮拜英超聯替熱刺射入加盟後首個聯賽入球，成為球隊贏波功臣。領隊荷杜賽後就大讚呢位靚仔中場，重話列納等於係佢哋嘅「碧咸」咁話喎，聽到佢咁講，就令我求大俠諗番起九八世界盃。
當時英格蘭嘅領隊就係荷杜，嗰陣碧咸喺英超聯已經開始鋒芒畢露，但荷杜就有鋪癮，就係鍾意用佢球員時期效力過嘅熱刺啲球員，所以碧咸就算踢得點好，個正選位始終爭唔贏安達頓。
到咗今日，荷杜竟然用佢當年睇唔起嘅碧咸嚟做讚賞列納，係就係馬後炮嘞，不過好穩陣噃。不過咁，佢嚟到熱刺後能夠令費迪南、安達頓、列納呢啲被傷病困擾職業生涯嘅球員獲得重生，都值得一讚嘅！
嗰日我求大俠睇見一個廣告話有本叫《波神馬經》嘅波、馬刊物快將推出，嚇到我以為波神「老兼」，拿拿臨問佢，點知佢好㷫咁話係有人用咗佢嗰名，重話今屆表現失準，唔知係咪咁嘅關係。為咗唔想令人誤會，佢決定改叫「蘋果波神」，一於改名轉運。
估唔到前哥倫比亞國腳艾斯派拿真係加盟英丙聯球隊達寧頓！其實呢單嘢擾攘咗幾日，但我求大俠覺得艾斯派拿冇理由同啲英格蘭球員爭飯食嘅，點知佢喺前日真係加盟，過埋體測就可以上陣。不過話時話，佢冇做國腳咁耐，點有工作證呀？
原來喺上星期六利物浦對修咸頓嘅英超聯，球迷幾乎有脫衣舞睇。話說修咸頓嘅中場費南迪斯喺賽前同利物浦嘅迪奧夫打賭，只要迪奧夫入兩球或以上，佢就剝光豬。結果迪奧夫真係梅開二度，咁費南迪斯亦即刻除衫，喺佢想除褲之際，迪奧夫就阻止，話唔好玩得咁大。