港股噚日全日成交先至得唔夠34億元，真係靜到蚊飛過都聽到。經紀陳話，再咁搞落去，一係就要搵多份兼職，一係就要轉行，唔係就要等住食穀種。
不過靜還靜，一樣有人開工炒作，好似宜進利（304）供股認購不足，大股東同包銷商要上身包銷，但隻股一樣有得炒，噚日又升15.3%，收23.3仙。
宜進利剛剛完成1供2，以每股0.18元發行3.7億股，集資6300萬元嘅供股計劃。因包銷而上身嘅朋友，睇嚟都唔使驚，好快就走得甩。
經紀陳話，大家唔應該因宜進利供股認購不足而睇淡佢，隻股公布供股後，股價急跌冇人維持秩序，就可以睇出有人可能唔想小股東供股。由於今次供股少人參與，令到大股東成功增持，可能有人更歡喜。
宜進利股價到家陣先至升，其實相當合邏輯。至於包銷上身嘅朋友，就更加需要炒高先至散到貨。
慕容小初