今日同大家講吓科技大學校長朱經武兩個同豬有關嘅秘密。科大校方噚日搞咗個迎新會，歡迎千幾個新生，好多學生哥都話好仰慕校長朱經武，見到佢嘅廬山真面貌，即刻好似fans見到偶像咁，圍住佢問東問西，有人重將件衫當紙，要佢親筆簽個大名。一向親民嘅朱校長當然唔會托手踭。
朱校長簽咗朱經武三個大字，重好搞鬼咁畫埋一個好可愛嘅豬頭，令到大家都好好奇。原來朱校長因為姓朱，細個時俾人叫做「豬仔」，所以佢認咗豬頭做佢嘅嘜頭。第日大家見到佢，可以唔叫佢朱校長、阿Paul，叫聲「豬仔」。
第二個關於佢鍾情於豬嘅秘密，係同朱太陳璞有關。據講國際知名數學家陳省身個女陳璞，自細喺美國長大，唔係好識中文，當初識朱經武時，以為「朱」就係「豬」，「豬仔」覺得好好笑，到𠵱家重記得。
有學生問「豬仔」覺得自己同光纖之父高錕有乜唔同，佢冇答到，只係話：「我同佢好熟。」並向班新生承諾，會將科大發展成一間研究型大學。
傳真︰2623-9278
電郵︰