地產多聲道:國際都會有條置業績街

地產多聲道:國際都會有條置業績街

長實今年5月統一紅磡國際都會業權後,終於推出寫字樓同商場招租,昨日首次招待記者實地參觀,但因負責租務同事臨時有事冇嚟,只能提供寫字樓呎租十五蚊,商場呎租二十至六十蚊,免租期一至三個月等基本資料。

長實發展部高級助理策劃經理游榮昇話,物業好先進,十五層寫字樓,每層分十六區,每區可二十四小時獨立調較冷氣,慳番唔少冷氣費。
而七至九樓三層商場共三十六萬呎,有二百個舖位,面積一千到四萬呎,其中七樓萬三呎大堂用作舉辦大型展覽、車展或音樂會。
商場最吸引蘭西嘅地方,就係九樓,將有一條置業街。長實話,會預留部分舖位作樓盤示範單位展銷場,餘下舖位就租畀與置業、家居生活同布置有關商戶,商場每層約十二萬呎,如果長實最終用晒全層,可能有機會問鼎全港最大樓盤展銷場。不過長實𠵱家喺紅磡幾個商場內都已經闢出示範單位同售樓處,重要再整多個,睇嚟真係有好多盤要推。

新盤宣傳唔使等賣樓紙
政府早幾年已陸續取消限制炒樓措施,𠵱家更再畀方便發展商,等佢哋可以早啲搞宣傳活動吸引市民注意。只要攞到批文,喺賣樓紙批出前,就可展開一連串宣傳攻勢,包括派發樓盤資料,喺報紙、電台及電視台賣廣告,畀市民參觀示範單位及模型,同埋搞啲比賽或活動等,當然價單一定唔可以喺未攞賣樓紙前公布啦。
但係政府話明呢段期間,發展商唔可以同市民簽任何臨時買賣協議,或預留單位文件,唔可以收預留單位費或訂金等活動。如果收到任何有關售樓處秩序或宣傳資料有誤導等投訴,政府都會立即叫停。

新地住戶活動愈搞愈遠
發展商起樓賣,唔單止要一條龍服務,重照顧埋住戶嘅唔同需要。新地最近幫住戶搞親子活動,但唔係以前喺屋苑齊齊種花嗰種,而係安排一家大細去山西省體驗當地生活(圖二),了解風俗民情,學習傳統中華文化。呢個「交流營」為期十日,小住戶可以參觀博物館、學少林拳同練書法等等。𠵱家做發展商真係要好有諗頭至得。

和黃珠海盤攞獎
港商在內地起樓,因規模大,規劃及配套都較完善,和黃在珠海嘅海怡灣畔,就以地中海度假住宅做主題,最近獲珠海旅遊局頒發「模範度假生活小區獎」,令此盤聲價大增。
海怡灣畔二期上個禮拜六喺香港推出,首批26伙即日賣清,發展商加推應市,到噚日累售50伙,八成半買家採用即供付款法。物業預計今年底入伙。
蘭西
電郵地址:[email protected]