tom.com買亞視小股東林百欣、麗新發展所持有嘅股權，奇峯突出，連番風雨。如果知道晒啲內幕，寫番出嚟，肯定可以賣多十萬紙，可惜大家都唔知，或者知啲唔知啲，作古仔就得，如實報道就一定冇。
王兟踢爆劉長樂，陳永棋兩人嘅「官方回應」，原來佢哋曾碰頭幾次傾買賣，只係價錢傾唔埋而已，但劉陳兩人以前就對傳媒講佢哋無意出售亞視股權。以後大家對啲名人談話，只應信五成再折五折，唔好以為凡報道皆屬事實。
最妙嘅就係tom仔宣佈唔買之後，大報又頭版報道霍英東可能會接力買下林伯、麗展嘅亞視股權。點解會有咁嘅傳聞呢，諗落空穴來風，未必無因，於是周圍八卦吓，卒之搵到一位消息人士肯開金口講啲咁多。呢位仁兄話：「亞視股權結構不穩定，小股東想出售股票，亞視唔賺錢，乃眾所週知嘅事，小股東求售，並非突然嘅事，層峯知道之後，恐怕股票會落入一啲undesirableelements手上，對香港唔係幾好，於是表達希望一啲有頭有面嘅集團做買家，等亞視有個好歸宿。你知啦，今時今日，人人㩒住荷包，邊度有人肯去入股蝕本生意吖，最後卒之搵到人捱義氣，經正常審慎商業原則去收購，點知又告吹……」佢講到呢度，唔肯再講落去。哦，左丁山明白些少嘞，義氣仔女陸續出現，希望唔好似走馬燈啫！