生命科技（1180）陳主席，做咗上市公司商會臨時籌委會主席，呢個會在仙股風暴之後先至成立，好似有啲同監管機構抗衡嘅意味，睇嚟陳主席好勇猛。
講起生命科技，早排先至包架私人飛機，宴請投資界同埋傳媒到山東睇廠，一行有成90人之多，聲勢相當浩大，相信所費不菲。
呢個trip如果可以加深投資者對公司了解，並幫助股價造好，當然係值回票價。不過，生命科技股價只係彈過一陣，好快趣又回落，上周五跌2.8%，收0.208元。
經紀陳話，冇水冇辦法，除非有人肯拎錢出嚟炒，而且隻股好似有人等出貨，搞到股價升唔上。
隻股在數月前，曾經透過一間台資行先舊後新配股，以每股29仙，配售2.3億股出街，但可惜之後股價就開始腳軟，仙股風暴中，股價一度跌落0.16元，高位要咗貨者真係心都實埋，聽講到𠵱家仍然有人哇哇嘈。
慕容小初