恒指於8月6日跌到9633的低位反彈，到上周五，恒指創出今次反彈高位10479，共上升846點。8月6日是甚麼日子，係農曆的6月28日。
筆者曾引述「高人」之預言，話農曆5月及6月係今年最壞的月份，股市將會大跌，事實證明，呢兩個月冇好過。
恒指由農曆5月初一的11300水平反覆下跌，到農曆6月底跌到9633，共下跌了1667點，跌幅近15%，但細價股就出現大股災，跌幅4至5成的比比皆是，跌幅6至8成的亦有不少。細價股股東9成9係小股民，係香港人，親身承受了最壞兩個月的「災難」，財富又唔見一大截。
先苦後甜。「高人」話未來幾個月會有好日子過，但農曆11月會係另一個壞的月份，但唔好的程度，冇農曆5、6月咁差，總之到時仍要小心為上。
大市形成雙底反彈，到上一個徘徊區的底部10400水平遇到阻力，出現後抽，整固後可再上，若有力破近期高位，中期到底之勢便可確認，上升目標指向11000。為穩陣計，以10日線止賺?蝕。
個別股票方面，路訊通（888）呢個位買得過。消息話，有大行會出報告推介，事實上，環顧戶外媒體股，路訊通無疑係最「實淨」的一隻，股價上升潛力亦最大
路訊通本地業務已建立穩固基礎，現時正大力拓展內地市場，早前已收購戶外媒體廣告公司上海亞飛，擁有上海淮海路廣告業務之專營權；另與6家內地客運經營商簽訂備忘錄，發展內地8個城市共1萬部車輛的多媒體廣告，除移動電視廣告外，巴士亭及車身廣告亦會覆蓋。公司預計，未來3年內地業務佔總營業額可達3成，5年後上升到5成。
今年5月初，路訊通股價曾見2.7元，本月中落到1.34元才反彈，升上1.74元後回至1.62元，形成旗形，若上破1.7元阻力，短期量度上升目標為2.1元，中線以12個月為期，股價有機會重上2.5元，預期升幅達5成。
郭兆誠