明年上半年三菱會推出全新LancerEvo.Ⅷ，其中一個原因係嚟緊11月，富士會有部新版ImprezaWRXSTi新車面世；佢唔單止有全新包裝嘅外形，近似Legacy嘅頭燈組合，重有新款鬼面罩同大型氣霸，令賣相變得趨時吸引之餘，一台輸出280匹嘅2.0公升Turbo偈，馬力不變惟扭力突破39.0kgm大關，推高至39.2kgm峯值輸出，因而激發三菱車廠對LancerEvo.Ⅷ嘅催生嘛！
究竟呢部ImprezaWRXSTi新版有幾好？係忠實Fans嘅話，就要拭目以待喇！
大發Copen新版更吸引
雖然大發部Copen仍未正式在港發售，但外間口碑不俗，除日本本土銷量持續上升，有供不應求嘅情況外，出口訂單數量亦見不斷增加。然而，早前車廠亦接到外地入口商嘅要求，事緣現時Copen嘅引擎配搭僅得一台660cc偈，未能切合歐洲地區嘅市場需要，故廠方經已考慮替Copen，增加1.0公升或1.3公升新版。及至最近日本傳來新消息，話大發車廠會響明年下半年落實推出1.3公升新型號，引擎沿用YRV嘅四汽缸組合之餘，新車重有全新外觀，最大變動會係車頭組合，全新鬼面罩及氣霸設計，予人有更趨時嘅小跑車風格呢！