無綫劇集《烈火雄心II》噚日喺黃大仙龍翔中心搞咗個「烈火雄心II之消防體能大測試」，出席演員有王喜、蒙嘉慧（YoYo）、歐錦棠、文頌嫻、鄭嘉穎同元華等，現場所見YoYo似乎最受歡迎，經常有人向佢攞簽名同合照。
噚日YoYo着住低胸背心，佢玩「沙包掌上壓」同「Sit-up爆氣球」兩個遊戲時，因為要跪地同彎腰，令到佢幾乎春光乍洩。
問YoYo係唔係刻意性感，她話：「冇呀！今日好熱。我冇性感，我有打底，又冇露。」問YoYo係唔係豐胸之後，自信心返晒嚟，唔介意行性感？佢好緊張咁話：「平時我都有着背心，唔係今日先着。」
有人話YoYo喺《烈火雄心II》入面身材冇咁好，YoYo即刻話：「係啊！我都覺得拍《烈火》時，個bra唔係咁好，之後張玉珊介紹咗另一款bra畀我，𠵱家好好多，都係用pushup好。」
方力申（Alex）噚日喺屯門出席「惠氏金裝BB叻叻四倍世運會」，教小朋友做運動，見佢同啲小朋友玩得非常投入，最後方力申重獲贈嬰兒奶粉。
不過AIex就話自己係食人奶長大，佢話：「我出世係食人奶㗎，之後先轉番食奶粉之嘛，食咗人奶幾耐就唔多記得，因為嗰陣時太細個，不過人哋話食人奶嘅BB會健康啲。」
馬楚成𠵱家要返北京幫中國星開拍由古天樂同應采兒主演嘅戲，原本拍一個月就返嚟開寰亞嘅賀歲片，部戲由成龍主演，但聽聞最近馬楚成已推咗部戲，因為佢同成龍意見分歧，佢唔想到正式拍嗰陣冇空間，所以思前想後都係決定搵過其他戲嚟開好過。
張學潤（Nelson）本新書《Nelson話鬼之你》噚日喺灣仔會展搞咗個簽名會，佢嘅好友商天娥同施念慈都有去捧場。
Nelson話：「我為咗影本書個封面，特登揀咗三十八套衫，封面套衫都過萬㗎，而拍攝地方係喺玩塔羅牌嘅外國女人嗰度影，佢重話我本書會好賣得！」
最近有唔少公司都想捧新人，而其中一間公司呢輪重好積極將新人介紹畀圈中人認識。
聽講呢間公司嘅老闆喺上兩個星期就將其中一個妹妹仔介紹畀一個巨星認識，咁樣嗰晚佢哋就……。事後聽聞個巨星重送咗份禮物畀個妹妹仔。
唉！𠵱家做新人真係唔容易，有時想紅真係要付出幾大代價。
蕭芳芳老公張正甫前晚以善寧會籌募及宣傳委員會主席身份，同民政事務局局長何志平、梁智鴻醫生，出席喺尖沙嘴舉行嘅「善寧會之音樂的喜悅」酒會。張正甫話原本同太太蕭芳芳一齊嚟，不過太太咁啱隻眼爆咗微絲血管，所以臨時嚟唔到，之前生蛇先好番，𠵱家又到隻眼有事。