樓市靜咗兩個月之後，新地在8月份出招，推出馬灣珀麗灣，2569伙近沽清，刷新近年賣樓紀錄，部份地產代理行今個月嘅業績都係靠佢起死回生。不過，各代理公布嘅數，同樓盤可供發售嘅總數仍有些少出入。
珀麗灣今次共套現六十億，畀代理嘅佣金2.1%，即係1.26億元。鴻運田國強、利嘉閣何紹章同香港置業胡日發都話今個月公司條數都係靠珀麗灣。田國強話做完珀麗灣後遲啲會搞個祝捷會；何紹章就話冇乜嘢搞；胡日發話會送獎品畀做到數嘅同事。
中原陳永傑透露，佢哋做珀麗灣總共收到約三千五百萬元佣，但暫時計落今個月都係打和多，有冇得賺要睇埋今個禮拜。佢哋上周六晚喺葵芳新都會廣場擺咗十一圍慶祝，食咗先算。
另外，美聯布少明話，佢哋做到約千宗珀麗灣成交，上個周六晚即刻擺咗十圍慶祝。
𠵱家一手盤佔代理行收入嘅比重都唔細，若市道轉靜，佢哋都幾頭痛。
馬灣珀麗灣火速去貨，同發展商新地嘅做勢手法成功有好大關係，同行都好想知道方法，上個禮拜六開賣當日，部份發展商派員到場了解銷售情況，向老細滙報，有啲重借助埋代理喺揀樓處刺探軍情㖭。珀麗灣好賣，其他發展商梗係想抄番啲「橋」，等自己嘅盤可以好賣啲，唔係點向老闆交代。
新鴻基地產上個禮拜六，一日賣出馬灣珀麗灣近千八個單位，寫下近年賣樓史光輝一頁，不過呢個盤嘅呎價，今日都重係「不解之謎」。
珀麗灣首批及第一度加推嘅價，新地一早公布，但8月19號公布第二度加推約千四伙，新地代理執行董事雷霆在開售前兩日被傳媒追問，先講話每呎三千幾，新地當日重致電蘭西鄭重講話係三千三蚊。但周五攞到價單一計，就只係2583蚊。新地解釋，係計埋將加推嘅第5同6座，而開售當日又話以全部2569伙計算。
新地點解事前要講個比實際高嘅呎價呢？對佢哋有乜好處？蘭西聽講，代理上周五睇到報紙都嚇咗一跳，但就易sell好多，因為最後個價平咗一大截。
新地近年積極強化公司品牌，今次咁搞，個金漆招牌唔知會唔會受損？若所有發展商都咁做，地產新聞咪全部變成虛假新聞？