美股上禮拜五散幅唔細，港股暫時都好難有運行。不過，由上個月最慘情起計，杜指仍然高咗17.8%，納指仍然高咗15.8%，恒指只係高咗6.4%，港股升幅唔大，唔使過於悲觀。若然港股今日碌得多，則可以揀啲Call輪玩吓。
中移動（941）上禮拜共跌去80仙，收22.05元，見21.50元買入Call輪，對象係9376同9405，兩隻輪都係槓桿率夠大，當然溢價亦唔低，買賣最活躍。
短線炒輪，只要數據唔太離譜，最好揀啲買賣快捷嘅。9376做15.9仙，見13仙買入。9405收19.3仙，見16.4仙買入。
長實（001）上禮拜四派完半年成績表後，表現唔錯，曾經升過1.25元，最後埋單仍升25仙，收58.50元，跑贏大市。
長實若隨大市回落，趁低買啲長實Call輪亦諗得過，揀長期少少嘅比較化算，正路對象係9429，現價39仙，溢價14.0%，槓桿率15.0倍，明年1月杪至到期，有5個月玩。長實以前好活躍嘅Call輪9252已屆末日，下月6日屆滿，現價3仙，溢價6.3%，槓桿率195倍。時間因素不利，好大機會係咁先，咪貪心搞呢件。
章 盛