近排跟車行中人傾談，佢哋都不約而同咁跟亞Mark話，本田香港代理嘅掌舵人麥Sir，最近成為咗佢哋心目中嘅領導人，日常班Sales嘅汽車買賣，無論新車抑或係舊車，馬首是瞻都要睇吓麥Sir有乜動靜咁話。事關近期本田代理主動出擊，Accord破天荒咁以最低唔使15萬嘅價錢開賣，不但令中價日本車起咗好大變化，就連二手車市場亦受掀動；而早兩日佢哋又再度出擊，將原有HR-V大減一萬，以13萬9千嘅價錢，就可以擁有一部四驅RV，兼且重送你原廠霧燈連擾流器，重有尾定翼同全車皮椅㖭！你話呢份誘惑又點可以抗拒呢？聽聞遲吓Civic部1.5EXi或許又會有減價行動，屆時9萬左右就可以擁有一部家庭車都唔定㗎！你話係咪要睇麥Sir嘅決定吖！