記得中國雙李加盟愛華頓嘅時候，焦點去晒同贊助商深圳科健較有關係嘅李瑋峰身上，點知𠵱家響愛華頓撈得掂嘅，就係一直受國外傳媒冷落、連記者會都無乜亮相過嘅李鐵。
繼首戰已獲正選機會後，李鐵上個禮拜對新特蘭亦係正選上陣，有傳媒為球員賽後評分，李鐵今場得分重高過效力曼城、亦於同日助球隊贏波嘅另一中國國腳孫繼海𠻹！搞到未出過場嘅李瑋峰就更「斯人獨憔悴」。
不過，今個禮拜愛華頓嘅風頭人物，應該係另一個「李」生──李察胡禮至真，首戰失兩個大意波成為「罪人」嘅佢，今場對新特蘭就救出一個十二碼，但又試過將個波誤拍入自己龍門「擺烏龍」，好在球證吹罰新特蘭在先，唔通李察胡禮想搶番李鐵既風頭？
最近堅尼本自傳係咁爆料，搞到曼聯𠵱家要求碧咸，要先將佢準備推出嘅自傳內容畀佢哋「檢閱」先，唉！咁碧咸本書實唔慌多料爆嘞！好在，踢緊丙組隊埃克塞特嘅前曼聯左翼沙柏，亦話要出自傳，重講明會爆更多料，要睇嘢嘅球迷記住認明「商標」嘞！
之前喺度講過「畸保」最近新增咗四個台，其中50台「法國TV5」就可以睇到法甲聯部份直播賽事，雖然月費要畀多百幾蚊，但我求大俠為有波睇都無所謂嘞。上星期六就睇到雷恩對馬賽，雷恩喺打少一個之下仍可以不理後防，好似自殺咁任得馬賽狂攻，終於完場前真係畀人射到三比一，呢場法國波都幾好睇呀。
都話咗意大利球壇黑暗㗎啦，但係諗唔到離譜到咁。話說基爾禾嘅巴西外援艾拔圖被揭發盜用人哋嘅身份，令佢可以喺意大利搵食，而且真實年齡係二十六歲，唔係二十三歲。佢雖然已經公開道歉，但係呢我求大俠認為呢單醜聞比用假護照更嚴重，據講嗰個原本係巴西農民嘅真正艾拔圖將會告佢，有機會令佢坐監㖭，假艾拔圖今次真係一身蟻嘞。
朗拿度已經喺上周末返去米蘭，但係佢為避過喺機場約一百名國米憤怒球迷嘅指摘，竟然偷偷咁走後門，唉！身為一代球王竟然做咁閃縮嘅嘢，過街老鼠咁，成何體統？我求大俠相信佢唔敢面對現實，即係話自己心虛同理虧。哨牙仔，我求大俠都幫唔到你嘞。