中國人習慣飲茶，但亦有港人到內地開創咖啡文化，還在深圳開了數間分店，如今正計劃向上海、北京等地發展。作為老闆之一的麥生說因為當地人消費力高，講求品味，就算一杯?56的藍山咖啡都很受歡迎，所以搞咖啡店是一盤不錯的生意。
記者：羅蘭 攝影：Manny
自言飲咖啡飲了三十多年的麥生，原本是個會計師，到深圳工作和居住已有十多年。「我哋原本想喺北京、上海開咖啡店，但因為Starbucks喺嗰度都開咗好多間，所以我哋先至來深圳發展，起碼呢度無大型連鎖咖啡店，而我喺呢度工作咁耐，建立咗好多人事關係，對當地人的習慣和文化都比較熟悉。
「加上我哋做過市場調查，知道全國重要城市的市民平均收入以深圳市最高，約每年US$6,000（約HK$46,800），比上海和北京要高上20-30%，所以咪決定喺呢度開始創業囉！」
由於內地人對咖啡文化不太認識，要改變其習慣，始終要多點時間。「唔好以為呢度無人飲咖啡，據我所知，經濟愈發達嘅國家飲咖啡的人愈多，而深圳又鄰近香港，好多人會上嚟開會傾生意，尤其是深圳𠵱家開設好多科技公司，I.T.人就最鍾意飲咖啡，而且重會搵環境好嘅地方飲；此外，上深圳做生意嘅鬼佬就更加冇咖啡唔得啦！」
做生意最緊要是找個好舖位，麥生最初搵舖時都遇過不少困難。「最初我想過喺百貨公司度開，貪佢人流夠多，但後來發現嗰度啲人聲尤其小朋友聲真係好嘈，如果想歎咖啡，都希望搵間環境幽靜嘅地方，所以否決咗呢個決定。
「之後我哋又試過喺人流極多嘅東門開舖，不過嗰啲真係人流，所有人都只係行過唔入去坐；而且東門又唔畀我哋整大門，所有冷氣都流晒出街，令到咖啡店內好熱，不但客人飲咖啡飲到熱，連員工都一面做一面出汗，最後我哋惟有關閉東門嘅舖頭。」
現在麥生開在深南東路的咖啡店，原本是間時裝公司，但因人流旺盛，他竟親自跟業主商議，成功從別人手中奪得舖位。「呢度以前係全深圳最旺嘅地方，所有連鎖店如Girodano、G2000咁，最先都只係呢度至有，所以舖租好貴。而我就自己主動搵業主，同佢講我哋嘅發展潛力，終於說服到佢將舖位轉租畀我。」
深圳曾經有不少港人嘗試開咖啡店，但最後都是關門大吉，麥生認為這都歸咎於他們對市場認識不深。「想喺深圳開咖啡店，最好要做得高檔，我哋會播Blues、Jazz嘅音樂，布置得又好有現代感和格調，見到我哋啲梳化就知我哋好揼本裝修，完全切合某啲人嘅虛榮感。
「其他咖啡店，好多都以食物為主如扒餐、意粉咁，而我哋嘅就以咖啡為主，所以根本方向好唔同。我哋一杯藍山咖啡都要?56，唔好以為好貴無人飲喎，就係因為咁貴，好多人都想入嚟試吓究竟貴喺邊，因為佢哋會諗咁貴一定會係好嘢。
「我哋嘅咖啡每杯都係用即叫即磨咖啡豆沖製，咖啡機亦係最貴嘅，沖出嚟嘅咖啡寧舍唔同，好多鬼佬都好鍾意。服侍客人嘅員工全部最少要喺公司培訓3星期，然後再跟店長實習3星期先可以完全上手，而擺放嘅機器同用具我哋都好講究，因為如果做嘢順手，配合流程，我哋就可以用最少嘅員工應付最多嘅人客。」
對麥生來說，做咖啡店最困難的居然是四周尋找適合的紙杯。「一個紙杯模原來好貴，我幾乎搵遍全深圳嘅紙杯廠，耐熱唔軟嘅紙杯都好難搵，呢度嘅紙質唔靚又唔夠厚。結果，終於要喺台灣入口，成本要$1.6一隻㗎。」
麥生預計，一間咖啡店的回本期約要18至24個月時間，他希望可以先在深圳打穩基礎，然後便進軍上海、北京等地。
「我哋已經不停同大公司合作做宣傳，例如我哋係今年民族文化村潑水節嘅唯一咖啡供應商，而且重想透過連鎖加盟形式，今年內喺深圳開10間分店。我哋會協助加盟商去攞商業登記牌照，又會幫佢哋做裝修設計同提供所有貨品，如果開一間舖面積約500平方呎嘅話，需要嘅資金大約50萬，我相信呢個係未來內地一種好有潛力嘅生意。」
投資年份：2002年4月
舖租（約500呎，2個月按金1個月上期） ?81,000
裝修 ?150,000
設備 ?150,000
人工（6名） ?10,000
入貨 ?50,000
雜費 ?20,000
流動資金 ?50,000
總投資額 ?511,000
平均每月營業額：?70,000
平均每月利潤：?14,000
1.加盟費：?200,000（包括培訓、店名使用權等）
2.5年後需續約
3.每月另繳特許經營費及廣告宣傳費共?5,000
4.不另收貨物運輸費（只限深圳區內）
1.衞生許可證
2.消防合格證
3.環保許可證
4.工商營業執照
5.稅務登記證
1.每月須繳交營業稅（每月營業額5.05%）
2.每年繳付所得稅（每年利潤所得15%）
深圳市工商局行政管理局
網址：