MichaelLau上一次（亦是第一次）在香港辦GardenerFigure個展，已是99年的事。大家記憶猶新，是當年幾乎擠爆香港藝術中心，連報紙港聞版亦有所報道。對他自己來說，與3年前辦展覽最不同之處，就是「今日多咗人認識」，其實MichaelLau已成為一個潮流界品牌，是年輕人心中的明星偶像，作品展到日本、台灣，名氣傳遍世界。
與上次不同之處，今次展覽除了由藝術中心轉移到位於中環的agnesb.Gallery，更由於一年添一隻Gardener，今次展出的已是一共102隻（比當年多出3隻）。新成員倒立好易認，原來竟然係Maharishi設計師HardyBlechman！
記者：何兆彬 攝影：陳智良
展覽前大家都覺得agnesb.同MichaelLau大纜都扯唔埋，點會合作搞展覽。其實若對b姐有認識，就會知道她素來愛藝術。agnesb.LibraireGalerie就是她開設的畫廊，專門展覽她喜愛的作品，無錯，要展出的作品都要由她過目挑選過，Michael：「這裏一年前開幕時，我就與負責人認識，大家都有意思要在這裏搞展覽，不過由於需要排期，加上要agnesb.過目批准，因此展出已是一年後的今天。」
agnesb.LibraireGalerie全世界只有兩家，一家在b姐老家巴黎，另一家不在東京不在紐約，就在香港，給b姐睇起，都咪話香港係文化沙漠。Galerie歡迎本地藝術家參與展出，有興趣可致電聯絡。（電話：28695505）
「做咗102隻Gardener今次呢隻最快，件衫事先車好咗，而個Figure就噚晚先開工，用咗3個鐘頭就做好。」眼中微有紅絲的劉米高說，「Hardy係我朋友，我事先同佢講話要做佢，於是Hardy就寄來自己做瑜伽動作的照片。佢啲瑜伽好勁，真係可以做到呢個動作！」平日話不算多的米高一講到朋友/Figure就眉飛色舞。
今次展覽名為《GardenerExhibition3》，與3年前其實一模一樣，「因為我的第1同2次係畫展，今次同上次一樣都係Gardener，所以一樣係3。」其實近年Gardener的版權賣了給日本Sony作代言人，曾在多個廣告中出現，曾推出過多款產品。但自此Michael把大量心血放上新系列Crazychildren等身上，相對Gardener就比較靜，不過他更透露Gardener與SONY的合約將會於明年約滿，屆時版權將會重回他身上，「同大集團合作有大集團好，但自己做番始終控制大啲。明年自己做番Gardener嘅Figure一定會多番。而夢想係Gardener可以有動畫，雖然比較遙遠！」
同場播放的，有日本Sony旗下VIEWSIC音樂電視台製作的Gardener宣傳短片，3D製作一班友仔踩板來來去去，好不自在。
展覽小資料
展覽點：agnesb.'sLibairieGalerie（28695505）中環伊利近街22號地下
展期：02年8月24日—02年10月20日
時間：每日12:00—20:30（逢星期一休息）