「冇人可取代霆鋒」
盧巧音要余文樂捱多幾年

盧巧音（Candy）昨日到藍田出席公開活動，對於外界指前男友余文樂可以取代謝霆鋒位置一事，Candy處處維護霆鋒，並暗寸前男友余文樂，奉勸「余生」要多捱幾年。

盧巧音昨日到藍田出席「麗港城商場星皓新星選拔賽總選」，早前陳冠希（Edison）曾表示謝霆鋒的位置無人能夠取代，記者昨日就此事問Candy的看法，她言語之間力撐緋聞男友霆鋒而暗寸舊愛余文樂，Candy說：「我都覺得冇人可以取代霆鋒，要紅唔係一朝一夕嘅事，因為佢有經驗之餘，重識得寫歌，而且佢份人諗嘢又成熟，對朋友又好好，唔係靚仔就得嘅。」

讚霆鋒識諗
Candy續道：「雖然霆鋒只得二十二歲，但係佢有時真係好識諗，不過佢都有細路嘅一面。」問她是否希望借這番言論力撐霆鋒，Candy說：「唔係，不過我覺得有時要捱多幾年，好似許志安、鄭秀文同埋蘇永康都係捱咗好耐先有𠵱家嘅成績。但係我要補充一句，我係對所有新人講呢番說話，唔係淨係對余生（余文樂）一個咁講。我都要捱四年先有今日少少成績，所以我唔係針對佢一個。」

力撐陳冠希
對於Edison前日於「太陽計劃」活動中，在余文樂身後做出反V手勢一事，Candy說：「我覺得Edison係冇心咁做，因為佢係一個極之貪玩嘅人，佢都係玩吓啫。」
而余文樂與黃伊汶昨日到沙田出席「群星愛心義賣Show」時，亦有回應Edison做出反V手勢一事，余文樂說：「我都唔知佢企喺我後面做咗啲乜嘢動作，其實都唔係咁大件事啫，可能佢都唔知個手勢係乜嘢意思。」
採訪、攝影：
楊潔雯、駱華齡