國際釋迦文化中心噚日喺尖沙嘴一家酒樓搞咗個「中元節盂蘭勝會祝福大會」，八方知道近期好多派米活動造成混亂，所以特登走去睇吓。點知個中心主席郭兆明話畀八方聽冇米派，而搞祝福大會嘅目的只係宣揚環保訊息。佢話為咗環保，其實市民應該唔好燒衣紙同紙紮用品，整到條街污污糟糟。八方問唔燒衣紙好似唔尊敬啲先人喎，但郭兆明就話可以捐啲錢去保良局，或者仁濟等等慈善機構，之後燒咗張收據咪得囉！
郭兆明重同八方講，𠵱家啲紙紮用品日新月異，但係冇質素保證。佢話你燒架車落去畀先人，可能個煞掣系統有問題你都唔知，所以燒落去重可能累到你啲先人炒車！
後來八方見到郭兆明同民政事務局局長何志平密密斟，唔知係咪想向何局長sell佢嗰套觀念呢！如果局長受嘅話，第時每逢農曆七月條街可能會乾淨啲喎！但係如果真係成事，咁一班做開紙紮舖、賣金銀衣紙嘅人士，可能就要成為失業大軍啦！。睇嚟何局長真係要好好衡量吓環保同失業問題嘅重要性，先至好做決定喇！
傳真︰2623-9278
電郵︰