財爺梁錦松將新婚夫人伏明霞收埋咁耐，終於齊齊公開亮相，重要係十指緊扣㖭！八方見到佢兩個噚晚八點拍住拖去文化中心聽亞洲青年管弦樂團表演。首次以新任財爺夫人身份公開亮相嘅伏明霞化咗淡妝，身穿一襲黑色絲絨裙同平底鞋，八方同其他行家都一齊衝上前影相，但係阿松哥同霞妹兩個都係同一個表情，笑笑口，唔答任何問題就拖住手行咗入場，真係夫婦同心。
到十點半散場，財爺夫婦喺文化中心十幾個保安包圍下離開，落去文化中心停車場攞車，在場十幾個記者亦死跟，早排傳財爺就快再做老竇，伏明霞個肚自然成為眾記者嘅焦點，但係只見佢步履輕盈，身形亦無變，記者直接開口問佢係咪有咗BB，佢亦唔答。
財爺揸住架四驅車離開停車場嘅時候，吸收咗上次車親記者嘅教訓，揸得慢，但係顧到記者又睇唔到燈，當時停車場門口嘅交通燈轉咗紅燈，但係財爺就照衝咗過去。
﹙圖﹚梁錦松、伏明霞噚晚去文化中心聽演奏，十指緊扣進場。
傳真︰2623-9278
電郵︰