近期備受香港車迷關注嘅本田Accord車系，究竟會否引入北美版到港，相信10月會正式揭盅；然而，早前代理曾極力爭取輸港嘅日本版新Accord，亦落實會響10月10日於日本本土正式發售。基於FaimlyLook嘅關係，查實東瀛本土版嘅Accord，亦跟北美同歐洲版Accord極為相似，惟鬼面罩、一體式泵把連氣霸，以及頭燈組合有異；日本版Accord尺碼較上一款稍大，而且重要來得圓潤一點，為4665×1760×1450mm，軸距有2670mm，車重約1380kg左右。引擎分有2.3公升（馬力200匹）及兩台2.0公升（馬力210匹同160匹）型號，全屬新一代VTEC四汽缸DOHC偈，相信日後更會有高性能版本Accord出現。至於五門Wagon版Accord亦同期發售，造型就跟𠵱家Alfa156SportWagon相似，但就會來得扁長一些。
為對應來年萬事得RX-8嘅誕生，日本三菱車廠經已落實於明年上旬，推出全新LancerEvolutionⅧ。新車造型沿出於現行Lancer車系，惟車頭布局卻屬新組合，要來得更具霸氣之外，新一代4G63B嘅2.0直4Turbo偈，輸出馬力同扭力輸出，仍維持響280ps/6500rpm及39.5kgm/3600rpm，惟引擎結構有新改良，相信有助高轉嘅耐戰力。新車尺碼4480×1770×1450mm，軸距為2625mm，車重1410kg，除6前速手波型號外，重有RS輕量版嘅5前速手波型號同輸出較低，配備半自動波嘅GT-A版本呢！而最受車迷關注嘅，會係新車底盤結構，除恒式四驅及電子AYC系統外，新改良追加嘅ACD裝置，亦會係車迷期待一試嘅焦點所在。
或許RV熱潮帶動所致，近期香港出現有唔少日本版豐田Caldina行走；然而，豐田全新Caldina五門Wagon車系，將於9月13日喺日本當地正式推出，當中備受一眾車迷關注嘅，會係高性能頂級版嘅CaldinaGT-Four型號，佢不僅賣相出眾富跑車味，一對聚焦頭燈連霧燈設計，加埋一體式泵把連氣霸，重好有Celica嘅氣息㖭！而佢最令人驚訝，會係一台2.0公升直4Turbo偈（馬力260匹），匹配4前速半自動波之餘，重有齊高性能跑車嘅四輪碟煞、ABS連EBD裝置，重有LSD及TRC等系統；再者，佢重附有恒式四輪驅動設計，相信未來佢會係富士Legacy嘅一大勁敵。