提起黃凱芹的名字，大家自然會聯想起他的緋聞女友周慧敏。九五年黃凱芹毅然離開香港移居加拿大，原來是因為與經理人公司弄至關係惡劣。隱伏七年後，黃凱芹對當初的決定從無後悔，而十月在港再開演唱會，亦只為滿足自己。
黃凱芹（Chris）九五年忽然在港銷聲匿迹，直至今年四月回港擔任好友黎瑞恩的演唱會嘉賓，大家才知道Chris原來已移居加拿大。
訪問當日，Chris甫見面便主動解釋當年悄悄離開的原因。他說：「我九五年係同屋企人一齊去咗加拿大，因為當時同製作兼經理人公司搞得好唔愉快，成日都有律師信往來，礙於我同唱片公司重有一隻碟未出，所以我又唔可以簽第二間公司，開始覺得有啲意興闌珊，咁咪想暫時唞吓，諗番起我當日都真係走得好輕鬆。」
Chris遠走加拿大前，在樂壇上的成績其實相當不俗，又是知名DJ，不過他對當日毅然放棄一切的決定，卻絕不言悔。
「好多人都會問我有冇後悔過，我可以好肯定咁答『從來都冇』，我去到加拿大最唔習慣嘅係天氣，同埋成日流流長唔知點打發時間。」
在加拿大從事樓宇翻新及買賣投資的Chris笑說：「我最高峯時有七間屋，不過𠵱家只係得番四間，我多數都會將啲屋翻新完就租畀人，嚴格上嚟講我可以算係一個業主，不過我好窮㗎。」
Chris十月會舉行個人演唱會，並會再次推出個人大碟。難道是眼看好友黎瑞恩婚前舉行個唱圓夢，所以Chris也想開一個演唱會來了結心願？
「我有咁嘅決定主要係想同一班鍾意聽我唱歌嘅人聚一聚，我從來都唔覺得我當年走要同任何人交代，所以我都唔覺得自己欠咗人任何嘢，而要開呢次演唱會補數。只係喺音樂上滿足自己，同當係同跟我咁多年嘅fans聚會。」
聲言於演唱會後便會立即返回加拿大的Chris，原來是因為他其中一間屋的天窗要改裝，而另一間屋的外牆又滲水，看來Chris的心始終繫於加國。
撰文：李珮洳 攝影：仇志德
協力：羅慧敏 場地提供：ClubHavana