黃凱芹離開香港樂壇前，與周慧敏（Vivian）的緋聞正鬧得熱烘烘，談起二人關係時，Chris卻笑得無奈。
「我同Vivian只係普通朋友，我都唔知點解啲人會咁傳，一係就怪我哋當年合作得太多，又可能係我同Vivian真係太過夾，所以就傳到似層層咁。」
提到感情生活，Chris語重心長地說：「感情呢啲嘢連我自己都唔清楚，咁我又點樣去同人解釋呢？事實上有冇結果都係自己知。總言之一句講晒，感情就係『如人飲水，冷暖自知』。」
繼Chris離開樂壇之後，Vivian亦淡出娛樂圈，專心做男友倪震背後的女人。
「佢都有同我提過呢件事，我自己亦都係揀咗退出呢條路，所以我都好明白佢嘅心情。我哋都有電話聯絡，就算最近我返嚟都有同佢食過飯。」
除了與周慧敏的緋聞廣為人知外，Chris與李克勤不和的傳聞亦可算街知巷聞，但Chris談到此事時，卻自言摸不着頭腦。
「我同克勤由始至終都冇仇，可能當時我哋同一間公司，咁我哋嘅歌路又似，大家就會攞我哋嚟比較啦！其實我都寫過三隻歌畀佢㗎，嚟緊月尾我重會做佢演唱會嘉賓。」