何超瓊（Pansy）同楊其龍（Gilbert）呢對過氣戀人同喺八月生日，聽日先係正日嘅Pansy，大前晚就同公司嘅員工喺蘭桂坊嘅KeeClub預早慶祝。而前日正日生日嘅Gilbert，亦都好蹺咁同班老友喺KeeClub食飯慶祝，對於呢個巧合，Gilbert話：「係咩？唔係啩。」
而Gilbert前晚嘅生日活動亦十分豐富，佢同班老友喺KeeClub食完飯之後，就到跑馬地英皇駿景酒店嘅PinkMaoMao繼續狂歡。雖然Gilbert嘅外籍女友唔喺香港，但佢一啲都唔寂寞，前晚出席賀佢嘅包括生意拍檔吳積遜同老婆江欣燕、江希文、家姊楊諾思同姊夫張堅庭、陳加玲、周立璟同女友AnaR.、杜德偉同女友周汶錡等。
約十二點，壽星仔爸爸楊受成亦都出現，佢重逗留咗成個鐘至離開，睇嚟佢兩父子嘅關係愈嚟愈好，好似之前一齊去睇世界盃，而由英皇主辦嘅新秀大賽，Gilbert又有份做評判。
朱茵、王秀琳（Mango）、蕭正楠同麥浚龍等噚日喺沙田新城市廣場，出席新城電台嘅「護心健體同樂日」開幕禮。朱茵首先獻唱兩首歌，佢話：「我爭取每次唱現場嘅機會，我好想多啲參與大型活動，等自己多啲信心，雖然有壓力，但可以令自己做得更加好。」
對於楊千嬅喺演唱會度走音，朱茵話：「我OK㗎，不過我冇資格去批評同行同埋前輩。」
黃伊汶噚日到舊啟德機場內嘅小型賽車場，出席新城電台活動，佢重親自落場同六位參賽者一齊比賽小型賽車，結果包尾而回。黃伊汶事後話一直都揸得好慢：「我哋呢啲靠塊面搵食，有乜嘢損傷咁點算？」
至於有傳有位圈中猛男送花追求佢，黃伊汶話真有其事，但𠵱家唔考慮拍拖。
林家棟噚日喺中區嘅香港視覺藝術中心，為「陳勉良近作展」開幕禮做剪綵嘉賓。原來家棟對繪畫幾有興趣，年輕時都學過畫畫，但出嚟社會做事之後就冇呢份閒情。講起劉德華單官司，佢話呢排同華仔拍戲時都有聽佢提起，但華仔嘅心情就冇受影響，會繼續拍埋套戲。
吳國敬前晚喺灣仔會展搞咗個音樂會，由老友劉浩龍做主持，梁漢文則帶埋女友，重有幾個前太極成員都有去捧場，獨欠阿敬女友仲春菲冇出現。阿敬話今次搞音樂會，主要係有個朋友好鍾意夾Band同埋想出隻DVD，於是投資畀佢開音樂會。
陳啟泰噚日喺德福，幫亞視嘅《百萬富翁全港狀元邀請賽》宣傳。陳啟泰話呢個禮拜五、六、日，會喺文化中心做一套歌劇，呢套歌劇係荷蘭嗰邊做搞手，所以搵佢做，要先得荷蘭嗰邊批准。陳啟泰重話：「套歌劇係英語對白，拍檔係陳潔儀，到時我要跳幾隻舞。」不過陳啟泰話自己跳舞唔叻，所以已要求唔跳咁多舞。