美股風雨飄搖嘅日子似乎過得七七八八，已經有好一段日子無炒股嘅散戶，喺個市況好番啲下，見到有乜就炒乜，搞到過去一個禮拜內，每日都有啲股仔升十零二十個巴仙。
據行家報料，市場上班大戶開始籌備銀両，希望喺港股回升嘅階段下，順勢炒番活自己隻愛股，藉此將個價推返上去細價股股災前嘅水平，就好似隻環球動力（231）咁，話說之前隻股嘅舵手換咗人後，咁啱遇到細價股股災，而國內調嚟炒股嘅銀両啱啱到，所以隻股仔要等到今時今日先有人出嚟維持秩序。
聽講只要個大戶一聲令下，隻股就可以隨時郁番，據市場人士所講，隻股仔今次會有機會見番6仙水平，時間重話係中秋之前，不過有冇膽量跟就自己諗。
另一隻各位炒友可以諗諗嘅股仔就係煙草公司何老闆隻泛華科技（1105），何老闆有錢就係人都知，不過佢入咗呢隻股之後，已經有一段較長嘅時間無乜表現，喺7月批咗股後，就一直未有新動作。由於隻股手頭現金充足，市場人士話佢哋應該會有嘢做，所以個股價點推都唔肯落嚟，加埋啲股份集中喺幾個大戶身上，就算喺上個月細價股股災嗰日，隻股仔個價跌穿3毫子就即刻彈番上嚟，呢幾日就更加升番上去，聽講係同一單新項目有關。
不過單嘢係乜，伏勝嘅線人唔太清楚，但話到明會係筍嘢嚟嘅，班市場朋友重叫伏勝睇實佢，因為隨時可能會爆上去一個Double都唔奇。咁當然風險都唔細，皆因隻股嘅前科係每次升上去成交就會縮一縮，買得太多可能個市消化唔到，所以各位要食大茶飯，真係要量力而為。
伏勝