昨日講「日以繼夜」；與白水泉食完飯之後，分道揚鑣，行去置地廣場（畢打街）搵的士，喺街口碰到優皮士榮哥仔，佢神情輕鬆，行路彈吓彈吓，上蘭桂坊去也。問佢：「唔使做到日以繼夜咩？咁輕鬆？」榮哥話：「我哋workhard,playhard，做得辛苦，都要鬆一鬆啫，有得做就日以繼夜，冇嘢做就要減壓。有嘢冇嘢有橋冇橋都日以繼夜，好容易做死人。」
榮哥仔在日本行做，經常與東京有聯絡，啲日本人做事非常賣力，男職員晚晚挑燈夜戰，乃係世界上日以繼夜嘅典型，同榮哥仔個款唔多夾噃。榮哥仔話：「唓，日本喺六、七、八十年代死做就話掂啫，踏入九十年代，經濟轉型，以科技知識經濟為主導，日本就衰到𠵱家，日本人死做都冇法子turnaround，我就最怕董特首走日本人條路，自己死做，叫我哋死做，卒之都係衰足十年，未見起色。」
同佢拜拜之後，行咗幾步，榮哥仔叫我返轉頭多講幾句：「喂，我啲東京同事傳畀我聽，話說何厚鏵訪問東京嗰陣，晉餐之際日本官員笑問佢每日是否如香港特首，每日seven-eleven咁搏命，何厚鏵眨眨眼，笑笑口話，佢自己都幾早放工噃。我都好想董特首早啲放工，留番啲精力諗吓治港必勝方案好過。講完，揚長而去。呢個古仔左丁山好似聽過，不過幾好聽，再聽無妨。左丁山自問出道搵食以來都未見過咁嘅環境，驚驚哋，亦係做到日以繼夜。有一次呻一呻，即刻俾老友鬧：「有得做，重呻命做乜嘢呀！」