出道兩年的李彩樺（Rain），往往給人鄰家小女孩的感覺。曾經有babyfat的阿Rain最近減肥成功，於穿衣學問上亦更上一層樓。阿Rain自言最滿意自己的鎖骨，但同時亦認為骨架較大，因此不喜歡穿太貼身的衣服，平時則喜愛以歐陸少女打扮，崇尚mix&match的穿衣哲學。
現年十八歲的年輕歌手李彩樺（Rain），出道之初曾當過模特兒，她笑言自小已經喜歡扮靚，她說：「自己係屬於比較女仔嘅人，好鍾意留長頭髮，係typical嘅女仔look。而細細個已經好鍾意幫公仔化妝扮靚，同埋唔知點解嗰時已經好鍾意着長boots，到咗大個就瘋狂去買，到𠵱家已經有十幾對boots。」
阿Rain身高五呎七吋，曾與一般少女一樣有少許babyfat，阿Rain笑言為了着靚衫而積極減肥，她還表示其身形有不足之處，她說：「因為自己嘅骨架較大，着貼身衫唔好睇，我會較鍾意稍為justfitted嘅衫。而自己最滿意係鎖骨部份，因為好凸出。」
不過阿Rain則十分喜愛歐洲時裝的剪裁，她說：「平時我自己會睇好多時裝書，始終覺得歐洲時裝cutting好啲，比較適合自己。𠵱家着衫好鍾意mix&match，唔會特別睇牌子同分平貴，有一排我重好鍾意去搵vintage古着。」
對於穿衣之道，阿Rain有一番見解的說：「之前做過模特兒，嗰時可能會好注重潮流，𠵱家反而會着番適合自己年齡嘅衫，青春一啲，而且比較鍾意着裙，不過𠵱家會貪方便成日着牛仔褲。但我買衫一定要試，因為之前試過未試過件衫就買返屋企，最後都係冇着過，覺得好浪費。」
李彩樺十五歲投身模特兒行列，當時有「縮水李嘉欣」的稱號，穿衣方面，阿Rain亦十分欣賞「大美人」李嘉欣，她說：「李嘉欣着衫永遠都咁好睇，帶出一個好自然舒服嘅感覺，可以好高貴、好時尚，令人眼前一亮，好配合佢嘅年齡。」
今個秋冬，阿Rain的mustbuyitem是牛仔褲及一些粗冷items，而她更推介英國品牌MatthewWilliamson，她說：「MatthewWilliamson啲衫好colorful，着咗之後人都sharp啲。」
採訪：RitaLeung
攝影：MatthewLam
服裝：Sportmax、Max&Co.
場地：CClub