患糖尿及腎病的馮女士，靠丈夫阿發從事地盤工人養活妻兒，可是阿發近月一直失業，以致家庭陷困，無力替女兒購買課本及校服準備開學，另缺錢應付「上樓」遷往公屋單位的搬屋費用。蘋果日報慈善基金即時撥款，助馮女士一家解決經濟困難。
馮女士向記者歎謂：「呢段日子我靠親友借錢接濟，食用要好慳。今朝去街市買份三蚊有一斤芋頭搭兩條苦瓜嘅減價餸，另外兩蚊一罐嘅回鍋肉，已經夠我三仔乸食幾日。有時我索性用腐乳送飯，總好過無得食。」
五十歲的馮女士，近年患上腎病、血壓高及糖尿病，須定時覆診和服藥，靠丈夫阿發做地盤工人，獨力維持家計。
可惜阿發自今年四月遭解僱後，無法覓得工作，令舉家生活陷困。「阿發冇工做，已經即刻去勞工處登記搵工，又不停睇報紙同託朋友介紹，但一直冇消息。我亦試過去啲酒樓同茶餐廳碰運氣，希望可以喺精神好啲嗰陣兼職做份洗碗或者清潔工作，賺番啲生活費，點知搵工真係好艱難！」
馮女士苦着臉續說：「我哋已經問親友借落唔少錢，𠵱家個個都怕咗我哋。我用埋手頭上百幾蚊之後，好難再借到錢，到時唔知點算！」
刻下，馮女士一家面臨三餐不繼，更為缺錢搬屋和負擔女兒的教育支出而愁煩。「我哋輪候好多年，𠵱家終於有得上樓，可以搬去屋租平又新淨嘅公屋單位，但搬屋要畀屋租、水電同煤氣等幾樣按金，加埋要幾千蚊。個女下個禮拜開學，𠵱家我重未有錢同佢去買校服同課本，更何況搞搬屋！」馮女士的女兒現年十二歲，暑假後將升讀中一。
馮女士稱，女兒一向專心讀書，成績優異。「個女知道屋企環境唔好，爸爸媽媽又讀書唔多，唔識教佢，所以好畀心機讀書，真係好乖女。」
在社工的協助下，馮女士近日已向社會福利署申請綜援，有待審批，現階段難以應付一家生計及女兒學習開支。
蘋果日報慈善基金了解馮女士的情況後，即時撥出一萬元，助她支付搬屋費用、為女兒購買校服和新學年課本，以及應付短暫生活急需。 捐款編號：C0658
暖流熱線
電話:29908688
傳真:23702192
電郵:
網址：