噚日廣播處長朱培慶出席新城台慶，一到就被大班記者圍攻，追問港台「專訪呂秀蓮」風波點收科。身陷記者堆中嘅朱培慶，就好似落入獵犬中嘅獵物，答完又答都脫身不得，最後可憐兮兮地向記者求饒：「我水都未飲過杯，我可以走得未呢？畀時間我享受吓今晚啦！」
鐵石心腸嘅記者不為所動，佢又出過第二招：「等下次再有同類事件發生時再傾過！」雖然卒之甩身，但咁講咪即係暗示會再約訪問呂秀蓮甚至陳水扁？
成功逃離記者「魔掌」嘅朱培慶走去同詩姐合照，一邊擺甫士，一邊一臉委屈地向詩姐訴苦：「啲記者圍住唔畀我走，不停咁問，我不停咁答。」詩姐則好關心咁話：「係咩？係咩？」但朱處長抬頭見到有文字記者伸長條頸聽緊佢哋講嘢，即刻轉口風：「香港記者真係好好！好嘢！」估唔到一向忠厚老實嘅朱處長都會咁滑頭。
（圖）朱培慶（右二）忙着向詩姐（左二）大吐苦水，甘國亮（左）則大擦霍建寧鞋。右為宋文禧。
傳真︰2623-9278
電郵︰