章小蕙被裕泰興財務入稟追討二億五千萬元一案，昨日在灣仔法院聆訊，但法官要到下周二（二十七日）才宣判。章小蕙昨日表示假若敗訴，她會上訴，並希望有答辯的機會。她又謂其身在加拿大的老父早前主動借出數十萬給她周轉，令她覺得丟架。
裕泰興財務向章小蕙入稟追討二億五千萬元欠款一案，昨日於灣仔法院進行內庭聆訊，羅守耀及章小蕙均沒有出席，雙方只派代表律師應訊。聆訊完畢後，章小蕙的代表律師莫樹聯透露雙方在一些細節上有爭拗，法官需要時間作出決定，所以至下周二下午才會宣判。
章小蕙昨日下午三時許返回其中環時裝店，記者問她若敗訴會否上訴？她說：「就算係敗訴，我嘅生活都冇改變，因為我根本冇窮過、冇富過。不過我就一定會上訴，爭取答辯機會，因為呢件事係關乎我人生嘅大事，𠵱家我冇機會自辯，我覺得對我唔公平。」
早前章小蕙不停表示要努力工作「砌數」，籌付律師費，昨日她透露其身在加拿大的老父早前主動借出數十萬元給她，章小蕙說：「我覺得既感動又丟架，因為我自二十二歲結婚以嚟，都冇靠過屋企，𠵱家要屋企人為我擔心，所以我一定會喺三個禮拜內還番錢畀爸爸。」而章小蕙昨晚出席一個酒會時，透露現時每月要付五位數字律師費，要到明年一月才付清。
問到章小蕙其父母會否對鍾鎮濤（阿B）這個前女婿失望？她說：「呢個一定㗎啦，連我啲女性朋友都話，我嫁咗畀個咁嘅人，離婚冇贍養費，重要照顧對仔女。」
另外，早前阿B在接受電台訪問時，透露兒子嘉浚（BonBon）曾咬過范姜，章小蕙前晚出席MarcJacobs鞋展時勞氣地說：「BonBon已經係青少年，佢應該有自己嘅私隱。BonBon都有同我講，嗰邊啲人成日講我壞話，佢都話聽到好煩，佢重同我講：『媽咪，我會用眼睇，用心感受，用腦諗，而唔係淨係用耳聽。啲人如果再講媽咪壞話，就會報警拉晒佢哋。』」
阿B昨在電話中回應章小蕙指控，他說：「乜佢咁快轉移視線去啲仔女度呀？佢鐘意點講由得佢，我留番啖氣練歌呀！」
而裕泰興財務董事總經理羅守耀昨日接受訪問，他表示下周二宣判時也不會出席。問他對結果是否心中有數時，羅守耀說：「總之我有信心啦，呢單只不過係一單好簡單嘅錢債官司啫，我哋不過係以合法理據行使債權人權利，我只係想快啲了結件事。」