近期各車行除以減價作招徠外,為旗下車款加裝升級配件亦為必殺技之一;坊間某大獨立車行亦深明此道,最近亦推出新款EstimaG-Edition特別版吸引買家。此車不但加有電鍍裝飾,豪華車廂布局更係賣點所在。若你正想以一部大型MPV作座駕的話,呢部EstimaG-Edition亦係一個唔錯嘅選擇噃!
記者:鄭達基
攝影:陳偉林
喺大家眼前呢部EstimaG-Edition,除裝有跑車化鬼面罩外,另外更裝有四輪電鍍跑車胎軨、電鍍門邊鏡殼、車旁指揮燈及尾燈銀白電鍍框邊,同埋巨型車尾定翼,望落可謂跑味十足;而指揮燈下方更有G-Edition字樣,令人更易識別其身份㖭。
此車以一台3.0公升V6引擎作動力核心,馬力輸出強勁,匹配一套4前速自動波,行車順滑流暢之餘,經改良嘅車廂結構亦能令行車時較前更寧靜;軟硬適中嘅懸掛加上低重心車廂設計,路面循迹性不俗,而跑車化嘅半皮半桃木軚環,把持感亦較前提升不少。四輪高效能碟式制動,加上ABS連EBD等電子系統,亦能予人有收放自如之感呢。
呢部EstimaG-Edition嘅車廂布局,與其他Estima一樣來得寬敞舒適之餘,全新高級透氣真皮座椅,襯以與Soarer開篷跑車一樣嘅淺色桃木配襯及電鍍門檻,豪邁之感盡在不言中;敞大雙天窗配搭,亦能令車廂更見開揚㖭。設備方面,除電窗、門邊電鏡、新款高級音響外,重裝有原廠冷氣連前後獨立送風口、原廠電動窗簾、中排獨立腳墊,同埋雙趟門連左邊電控功能等設備,從而為車上乘客帶來不少方便。