近日有小學生用《史丰收速算法》破咗健力士世界紀錄，可謂技驚四座。不過，著名數學家兼中文大學數學科學研究所所長丘成桐教授就唔贊成學生學速算，佢話破呢啲紀錄係朝夕嘅成功，比較膚淺。
丘教授噚日出席中大「數學英材精進課程」畢業頒獎禮，佢話速算唔係奧秘，用電腦或計數機去計數，邊個人都追唔上，唔需要淨係快。佢又話，學生太早出名，好似十一歲、甚至二十歲咁，都唔係好事，因為壓力太大，反而阻礙將來發展；就好似跑馬拉松咁，一開始就跑到索晒氣，好難再向前走。佢重話學生即使讀吓文學培養性情，都好過學速算。
咁樣點先至係唔膚淺嘅成功呢？丘教授同學生講，應該追求大自然嘅奧秘、一啲𠵱家未有人做到嘅嘢，未發現到嘅學問；佢話呢種先至係科學家追求嘅真正喜悅。真係高見。
傳真︰2623-9278
電郵︰