美股連續兩日反彈，重上9000點，不過呢一關阻力唔細，所以市場一般都認為美股會回吐，港股午後率先出現震倉，跌178點，收報10245，但成交只得57.53億元。
中移動（941）繼續被大戶空襲，累積空倉。Cookie話，早前大戶沽空滙豐（005），但滙豐中期業績不俗，難以壓低股價獲利，今次轉移狙擊中移動。
近期雖然傳出有熱錢流入炒民企，而二三線股亦蠢蠢欲動，不過ｉ師傅叫阿虎切勿輕舉妄動，首先民企隱藏嘅糊塗帳尚未完全曝光，唔少揸重貨嘅基金已想減持好耐。歐亞（932）前日急升15%後，噚日下跌8%，成交8229萬元。
二三線股方面，先前大幅反彈嘅正中藥業（327）噚日亦見回吐，大瀉18.7%，收報6.1仙，成交多達1305萬元。黑客話，大戶只係震倉，唔使太緊張。不過，阿虎嘅豬朋狗友已經骨水走人，唔再留戀。
ｅ莉莎就叫阿虎留意中糧國際（506），最近此股調整完畢，又再開始熱身，據聞稍後將落實向母公司收購大型資產。中糧噚日升4.5%，收2.325元，成交亦有988萬元，都算似模似樣。據聞下一站至少要見2.50元。中糧手頭現金充裕，進行收購應無配股壓力，但若能以較高股價發行新股收購，當然對中糧有利。
大市成交萎縮，仍然死水一潭，好多炒家都唔知搵咩嘢炒好，阿虎諗諗吓都想轉戰美國國庫債券，賺4-5厘息算數，咁嘅市況，真係唔蝕已經等於賺咗。
阿 虎